Rev 10 | PONPDN | STEP | O I kilaner amen tounlan kelail, me kotidido san nanlan, me likauida dapok eu, o aia mi pon kadokenmai, o silan i dueta katipin, o aluwilu a dueta ur kisiniai.

Revelation of John 10

1 O I kilaner amen tounlan kelail, me kotidido san nanlan, me likauida dapok eu, o aia mi pon kadokenmai, o silan i dueta katipin, o aluwilu a dueta ur kisiniai. 2 Ni lim a kisin puk mia, me papak pasan, o aluwilu a pali maun sokedi pon inadau, a pali main pon sappa, 3 O a kotin molipe kida nil laud, due laien amen ni a weriwer, o ni a molipeer, nansapwe isu ap nirinir. 4 A nansapwe isu niriniridar, i men intin, i ap ron nil eu san nanlan masani: Katene meakan, me nansapwe isu masanier, der intin ir edi! 5 Tounlan o, me i kilaner u pon madau o sappa, puekada lim a pali maun, 6 Ap kauki i, me ieiasata soutuk, me kotin kapikadar lan o meakan mi lole, o sappa o meakan mi lole, o madau o meakan mi lole, me solar pan ansau. 7 A ni dokan nil en tounlan kaisimen ni a pan pepeuk, iei ansau karir pan Kot kaunsokalar, duen a kotin kokop on sapwilim a ladu saukop akan ronamau o. 8 Nil o, me i roner san nanlan, a pil masani on ia er masani: U ko wei, aleda kisin puk, me papak pasaner, ni lim en tounlan, me uda pon madau o pon sappa! 9 Ari, i ap ko won tounlan o, potoan on i, en ki don ia kisin puk o. A masani on ia: Ale, ap kanala, a pan kasadikala kaped om, a ni au om a pan iau dueta onik. 10 I ap aleer kisin puk o san ni lim en tounlan ap kanalar. Ari, nan au i me iau due onik, a murin i kaner, kaped i ap sadikalar. 11 A masani on ia: Koe nok pil kokopada iran men liki kan, o aramas akan, o lokaia kan, o nanmarki toto.